Բազմաֆունկցիոնալ բարձրահարկ շենք՝ բնակելի շենքերի մեջտեղում. բնակիչները զայրացած են (տեսանյութեր, լուսանկարներ)
ՏեսանյութերԱրդեն երկու օր է ինչ Թումանյան փողոցի 30/1 հասցեում շինարարական աշխատանքներ են իրականացվում, բազմաֆունկցիոնալ շենք է կառուցվում: Այս հանգամանքը բողոքի ալիք է բարձրացրել հարակից շենքերի բնակիչների մոտ: Նրանք պնդում են, որևէ մեկն իրենց հետ քննարկում չի ունեցել և չեն իրազեկում, թե ինչ են կառուցում: ԼՈւՐԵՐ.com-ի թղթակցի հետ զրույցում տարածքի բնակիչ Աշոտ Ամիրզադյանը նշեց, որ իրենք դիմում են գրել քաղաքապետարան ինչին ի պատասխան ասել են. «Նախագծման թույլտվություն է տրվել կառուցվող շենքը պետք է բաղկացած լինի ստորգետնյա ավտոկայանատեղիից և 8 հարկերից: Իսկ ներկա պահին կառուցապատողի կողմից ներկայացված նախագիծը գտնվում է ուսումնասիրման փուլում: Եթե ուսումնասիրման ընթացքի մեջ է, այս շինարարությունն ինչպե՞ս հասկանանք: Մեր իրավունքները խախտվել են, մենք տեղյակ չենք թե ինչ շինություն է կառուցվում, չենք կարողանում փորձագետ բերել, որպեսզի հասկանանք այդպիսի շենք կարելի է այստեղ կառուցել, թե ոչ: Մեզ ցույց են տալիս դեռևս 2017թ. որոշման նախագիծ, որը մեզ չի բավարարում, մենք ասում ենք տվեք մեզ այս պահին եղած փաստաթղթերը որպեսզի կարողանանք առարկայական քննարկում կազմակերպել: Ասում են 8 հարկանի շենք են կաուցում, բայց մենք վստահ չենք: Այս ամենի մեղավորը քաղաքապետարանն է»,- ասաց նա:
Նշենք, որ նորակառույցը շենքը գտնվելու է Աբովյան 13, 11, Թումանյան 30 շենքերի հարակից տարածքում:
Բնակիչներին բարկացրել է նաև այն փաստը, որ 50 և ավելի տարիների կյանք ունեցող ծառերը վերացնում են՝ փոխարենը դնելով դեկորատիվ ծառեր: Նրանք պահանջում են ձեռք չտալ կենդանի այգուն. «Մենք պտղատու ծառեր ենք ուզում: Ինչքան կարող է ժողովուրդն ապրել ցեմենտի ու բիտոնի մեջ: Այդ կանաչապատ տարածքում մենք ինքներս ենք շատ տարիներ առաջ ծառեր տնկել, ջրել, խնամել: Քաղաքապետարանը որոշում էր ընդունել, որ ոչ մի շինություն չպետք է կառուցվեր կենտրոնում, ո՞ւր է օրենքը: Ինչ է կառուցողը գալու է այստեղ ապրի՞, իհարկե ոչ: Ինչ է նա շահ ստանա այսքան բնակիչ պետք է առողջությունից զրկվի՞: Լկտիությունն այն աստիճանի է, որ հաշվի չառնելով այսքան մարդու բողոքը շարունակում են աշխատանքը»,- իր զայրույթն արտահայտեց մեկ այլ բնակիչ:
«Ըստ նոտարի 1 հեկտար տարածքում կարող է բնակվել շուրջ 270 մարդ: Այստեղ ապրում է 400-ից ավելի մարդ: Փստորեն մեկ հեկտարի համար նախատեսված քանակն արդեն իսկ խիտ է: Հիմա էլ բազմահարկ շենք են կառուցում, բա հետո՞: Չէ՞ որ խախտվում են նորմերը»,- ընդգծեց Ամիրզադյանը:
Սոնա Հարությունյան