Ժամանակը եկավ, մեզ չպաշտպանեց, մեզ թողեց մենակ. Սիմոնյան

Երեկ՝ 28.03.2024-ին, Հանրայինի եթերում ՀՀ ԱԺ նախագահ Ալեն Սիմոնյանն անդրադարձել է հայ-ռուսական հարաբերությունների ներկայիս վիճակին և քաղաքական այլ հրատապ հարցերի։

Մասնավորապես, Սիմոնյանը նշել է, որ հայկական կողմը սահմանազատում իրականացնում է ոչ թե սպառնալիքի տակ, այլ` որ դա մեզ համար կարևոր  է։

«Դելիմիտացիայից հետո, այո՛, Ադրբեջանը ճանաչում է մեր սահմանը, բա ի՞նչ պիտի անի։ Այդ սահմանը պետք է նաև իրենց։ Հայաստանում որևէ մեկն օրենքով իրավունք չունի որևէ բան հանձնել։ ՀՀ իշխանությունը որևէ տարածք հանձնելու մասին նույնիսկ չի պատրաստվում քննարկել»,- նշել է ՀՀ ԱԺ նախագահը։

Հարցազրույցի երկրորդ հատվածում, պատասխանելով հաղորդավարի հարցին, Սիմոնյանը նշել է, որ որևէ մեկը Ռուսաստանի Դաշնության  դեմ ոչինչ չի անում։

«Մենք ունեինք ընկեր, ավագ եղբայր, որը պետք է մեզ պաշտպաներ։ Ժամանակը եկավ, մեզ չպաշտպանեց, մեզ թողեց մենակ»,-նշեց նա։ 

Հաղորդավարը հիշեցրեց, որ հայկական կողմին առաջարկ է եղել միանալ ՀԱՊԿ անդամ պետությունների խորհրդարանական պատվիրակությունների համատեղ հայտարարությանն ու դատապարտել Մոսկվայի «Crocus City Hall»-ում տեղի ունեցած ահաբեկչությունը, սակայն Հայաստանը մերժել է առաջարկը։

Ի պատասխան՝ Սիմոնյանը նշեց, որ հայկական կողմը առաջիններից էր, որ ցավակցել է և դատապարտել տեղի ունեցածը, բայց  ՀԱՊԿ-ի ֆորմատում ոչինչ անել պետք չէ, քանի որ անդամակցությունը սառեցված է։

«Բան ենք ասել, դա քաղաքական հայտարարություն է։ Չի լինի մի քիչ սառեցնես, հետո՝ տաքացնես»,-ամփոփել է նա։