Քիչ ժամանակ է մնացել այս տարվա Արեգակի առաջին և միակ ամբողջական խավարմանը

8 Ապրիլ, 2024 9:57

Քիչ ժամանակ է մնացել այս տարվա Արեգակի առաջին (և միակ) ամբողջական խավարմանը։ Այս մասին հայտնել է Շրջակա միջավայրի նախարարության հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը։

«Լուսնի ստվերը Երկրին կդիպչի ապրիլի 8-ին Երևանի ժամանակով 19:42-ին, և մոլորակից դուրս կգա կեսգիշերն անց՝ Երևանի ժամանակով 00:52-ին: Ամբողջական խավարման փուլը կսկսվի մոտավորապես 20:39-ին և կավարտվի 23:55-ին: Միջոցառման գագաթնակետը կլինի 22:17 րոպեին։

Լուսնի ստվերի հետքը կձգվի միայն երեք երկրների՝ Մեքսիկայի, ԱՄՆ-ի և Կանադայի տարածքներով։ Գոտու մեջ կներառվեն նաև Խաղաղ օվկիանոսի մի քանի կղզիներ։ Ամբողջական խավարումը կանցնի մեծ և միջին քաղաքներով՝ Մեքսիկայում՝ Մազաթլան, Դուրանգո, ԱՄՆ-ում՝ Սան Անտոնիո, Օսթին, Դալլաս, Լիթլ Ռոք, Ինդիանապոլիս, Բուֆալո Կանադայում՝ Մոնրեալ: Մոլորակի ընդհանուր բնակչությունը, որը կտեսնի խավարումը առանց տանից դուրս գալու, կազմում է մոտ 30 միլիոն մարդ:

Թեև ամեն տարի Երկրի վրա տեղի է ունենում առնվազն երկու խավարում, ամբողջական խավարումները շատ ավելի հազվադեպ են լինում։ Սա այս տարվա միակ ամբողջական խավարումն է (այս տարվա երկրորդ խավարումը տեղի կունենա հոկտեմբերի 2-ին և կլինի օղակաձև խավարում)։ Հաջորդ ամբողջական խավարումը տեղի կունենա 2026 թվականի օգոստոսի 12-ին, ինչը նշանակում է, որ դրա համար պետք է սպասել ավելի քան երկու տարի»։